કસુંબીનો રંગ
રાષ્ટ્રીય શાયરનું બિરુદ પામેલા કવિ શ્રી ઝવેરચંદ મેઘાણીની આ અવિસ્મરણીય કૃતિ. મન ભરી માણો કસુંબલ રંગને.
Audio clip: Adobe Flash Player (version 9 or above) is required to play this audio clip. You also need to have JavaScript enabled in your browser.
લાગ્યો કસુંબીનો રંગ,
રાજ, મને લાગ્યો કસુંબીનો રંગ !
જનનીના હૈયામાં પોઢંતા પોઢંતા
પીધો કસુંબીનો રંગ;
ધોળાં ધાવણ કેરી ધારાએ ધારાએ
પામ્યો કસુંબીનો રંગ … રાજ
બહેનીના કંઠે નીતરતાં હાલરડાંમાં
ઘોળ્યો કસુંબીનો રંગ;
ભીષણ રાત્રિ કેરા પહાડોની ત્રાડોએ
ચોળ્યો કસુંબીનો રંગ … રાજ
દુનિયાના વીરોનાં લીલા બલિદાનોમાં
ભભક્યો કસુંબીનો રંગ;
સાગરને પારે સ્વાધીનતાની કબરોમાં
મહેક્યો કસુંબીનો રંગ … રાજ
ભક્તોના તંબૂરથી ટપકેલો મસ્તીભર
ચાખ્યો કસુંબીનો રંગ;
વહાલી દિલદારાના પગની મેંદી પરથી
ચૂમ્યો કસુંબીનો રંગ … રાજ
નવલી દુનિયા કેરાં સ્વપ્નોમાં કવિઓએ
ગાયો કસુંબીનો રંગ;
મુક્તિને ક્યારે નિજ રક્તો રેડણહારે
પાયો કસુંબીનો રંગ … રાજ
પીડિતની આંસુડાધારે-હાહાકારે
રેલ્યો કસુંબીનો રંગ;
શહીદોના ધગધગતા નિઃશ્વાસે નિઃશ્વાસે
સળગ્યો કસુંબીનો રંગ … રાજ
ધરતીનાં ભૂખ્યાં કંગાલોને ગાલે
છલકાયો કસુંબીનો રંગ;
બિસ્મિલ બેટાઓની માતાને ભાલે
મલકાયો કસુંબીનો રંગ … રાજ
ઘોળી ઘોળી પ્યાલા ભરિયા : રંગીલાં હો !
પીજો કસુંબીનો રંગ;
દોરંગા દેખીને ડરિયાં : ટેકીલાં હો !
લેજો કસુંબીનો રંગ ! … રાજ
- ઝવેરચંદ મેઘાણી
(ફરમાઈશ કરનાર - નવનીતભાઈ પરમાર)
September 13th, 2008 at 1:50 pm
આ. મીતિક્ષાબેન,
ખૂબ ખૂબ આભાર, આ ગીત માણ્યા પછી જે તૃપ્તિ મળી એ અવિસ્મરણિય લાગી. ગુજરાતી સાહિત્યની વાત હોય અને શ્રી ઝવેરચંદ મેઘાણીને યાદ ના કરીએ એ કેમ ચાલે? એ રાષ્ટ્રીય કવિ ને મારા શત શત પ્રણામ.
આભાર.
નવનીત પરમાર.
September 16th, 2008 at 8:18 pm
ઘણા વખતે કસુંબીનો રસ પીવા મળ્યો. આભાર.
September 18th, 2008 at 8:47 pm
This is a evergreen song. Wish we could have heard it from Meghani’s own voice! Meghani’s contribution to Gujarati literature is unique and we are gratful to him.
With best wishes.
September 26th, 2008 at 7:21 pm
ગુજરાતી સાહિત્ય માં ”કસુંબીનો રસ” અવિસ્મરણિય,
શ્રી ઝવેરચંદ મેઘાણી રાષ્ટ્રીય કવિ ને મારા શત શત પ્રણામ.
December 13th, 2008 at 4:46 am
Dear Harshadbhai,
Thanks a lot and I enjoyed the “KASUMBINO RAS” . It’s beyond imagination and the meaning of each and every words are so authentic that to describe it I don’t have any words. It’s unique.
My “CHARAN SPARSH” to the greatest National Poet late Shri. Zaverchand Megani.
December 18th, 2008 at 8:29 am
I feel after listening there is nothing more to listen !